中環耳目：周智琪擺檔賣餅試反應
一連五日嘅「美食博覽」吸引唔少參展商，入場嘅人流更加係人山人海，自由黨前副主席周梁淑怡細女周智琪都擺咗個攤位，售賣自家品牌曲奇「Phoebe's Treats」，智琪話，首次喺舖頭以外地方賣曲奇，係睇中博覽會人流夠旺喎。
上星期五，老闆娘智琪去會展睇檔，見到客人上前，仲親自推銷。曲奇款式多達十種，首創嘅鐵觀音曲奇、伯爵茶曲奇，散發陣陣茶香，啱晒唔鍾意肥膩牛油味嘅人。
智琪喺中環鴨巴甸街開設餅店「Phoebe's Designer Bakery」，售賣特色結婚蛋糕及曲奇，今次走入美食博覽會，單係攤檔嘅租金都要三萬幾蚊，佢並非志在賺大錢，而係想藉呢個機會測試普羅大眾嘅口味反應。曲奇每包分別售四十二及四十八元，開檔幾日，智琪話生意唔錯。
智琪話，月底將進駐高級超市「Oliver's」及「Three Sixty」，等多啲人欣賞到佢嘅手勢喎。