中環出更：李應生帶隊 巡優質舖索料

行街買嘢係遊客訪港嘅必備節目，好多人會選擇門口貼住「優」字標貼嘅舖頭，貪佢經過旅遊發展局把關，貨品同埋服務有番咁上下保證。卓妮上周五喺銅鑼灣時代廣場行街，見到由「優」字商號組成嘅優質旅遊服務協會（QTSA）一班高層出巡，帶隊嘅QTSA主席李應生笑謂，佢哋特登去探訪四間會員機構，了解吓佢哋營商有冇咩困難，以便協會提升服務，咁至可以省靚「優」字招牌嘛！
Folli Folli亞太區高層Mary（左一）希望協會提供多啲免費培訓課程，李應生（左四）同負責公關嘅鄧梅芬（左三）知道點做啦！ （何偉鴻攝）
Folli Folli亞太區高層Mary（左一）希望協會提供多啲免費培訓課程，李應生（左四）同負責公關嘅鄧梅芬（左三）知道點做啦！ （何偉鴻攝）

話題集中客戶投訴

當日同行嘅仲有多位QTSA執行委員，包括太子珠寶執董朱繼陶、孖人牌代理商昌興行政總裁余壽寧、位元堂執董鄧梅芬等。佢哋首站去時代廣場十一樓嘅聘珍樓，順便用膳，然後去十二樓意大利餐廳Oceanna，跟住轉戰以潮流飾物為主打嘅希臘品牌Folli Folli，尾站係FANCL無添加化妝品。

FANCL董事總經理陳志明（左三）分享做生意之道，經營唔同生意嘅朱繼陶（左二）同余壽寧（左一）聽到入晒神。
  • FANCL董事總經理陳志明（左三）分享做生意之道，經營唔同生意嘅朱繼陶（左二）同余壽寧（左一）聽到入晒神。

卓妮見佢哋嘅話題集中喺處理客戶投訴方面，尤其是多啲了解內地消費者嘅心理愈見重要。一眾老細們細心聆聽咗成個下午，李應生話收穫好大，為協會未來提升服務提供咗一個方向。