中環出更：陳茂波日日晨跑耐性好咗
社會富爭議性議題多，如今做立法會議員，好易身心俱疲。唔想捱殘，立法會會計界議員陳茂波（Paul）做咗議員以來每朝晨早六點幾都起身跑步，原本目的係要過有規律嘅生活。兩年以來日子有功，佢發覺個人唔止體力好咗，連忍耐力都加強埋添。
與專業人士組「平衡會」
阿Paul有「晨跑」習慣，平日喺跑馬地跑半個鐘，星期日就跑長啲。早前一個星期日朝早，卓妮換上運動裝跟阿Paul練跑，起點係南灣。卓妮睜開惺忪睡眼，睇真啲，成班「跑友」早已埋晒位，阿Paul親切地上前打招呼，原來佢哋來自一個自發組織，名叫「Club Balance」（直譯就係「平衡會」），成員有銀行家、醫生、律師等，阿Paul都係當中一員，大家閒來約埋跑山頂、南灣等，老友到極。
當日仲有幾位來自香港專業教育學院（IVE）嘅學生，佢哋早前借阿Paul寫字樓做暑期功課，漸成好友。咪以為阿Paul唔夠後生仔跑。齊人後，佢先拉拉筋，整裝待發。一行人由南灣出發，經淺水灣、深水灣，再返回南灣，全程十公里，阿Paul用五十八分鐘就跑完，體能認真fit。佢話跑步嘅好處多不勝數，例如忍耐力加強咗，喺立法會聽同僚發言，耐性都好咗。
出咗一身汗，阿Paul嗌肚餓，叫埋班IVE學生齊齊去跑馬地著名嘅祥興咖啡室食早餐，歎番件最出名嘅蛋治同火腿通粉，即時補充體力。祥興係一間老牌茶餐廳，唔少名人、明星都嚟幫襯，走入祥興，就好似走入粵語片嘅場景一樣。
卓妮