前香港律師會會長黃嘉純獲委任為港台顧問委員會主席，不過佢同港台有咩關係呢？尋日佢首度以該委員會主席身份見傳媒時自爆，原來佢屋企有六部收音機，而且一路有追住港台節目喎！莫非因為咁就做到委員會主席？
呢個委員會一共有十一位成員，身為主席嘅黃嘉純尋日同廣播處處長黃華麒一齊接受鎂光燈洗禮。黃嘉純一開始除咗大讚港台外，仲特別提及尋日朝早佢出門口前，數過屋企總共有六部收音機，而且時不時有一、兩部係開住嘅，連出門都會帶住部手提電腦，咁就可以一路追聽住港台節目喎。
雖然黃嘉純十分賣力同港台「拉」關係，但佢點解能夠做到委員會主席嘅疑問仍然揮之不去，難怪有記者不客氣問：除咗屋企多收音機外，你仲有咩能力畀到港台意見呢？黃嘉純就笑笑口話，作為律師，佢好睇重言論自由同編輯自主，唔知大家收唔收貨呢？
記得港台電視節目《頭條新聞》被批評過陰陽怪氣，問佢有冇睇過呢個節目，黃嘉純突然耳仔都紅埋，唔知佢係好鍾意睇定係未睇過呢？咁就要問佢自己啦。