政情：政府陰招冚副局政助醜聞

港聞記者尋日經歷疲於奔命嘅一天，而且全部係由政府一手造成。對傳媒來講，尋日簡直係「黑色星期五」！放喺禮賓府心戰室內嘅政治計時炸彈，即係十八位副局政助表現嘅中期檢討報告，尋日終於公布，十八名政治新丁表現慘不忍睹，但竟無人要減薪，唔使心戰室研判，係人都估到報告一出，勢成政壇焦點，全城圍攻。政府為分散傳媒同公眾嘅焦點，不惜出陰招，一日內密集式公布重要消息，疲勞轟炸傳媒。

炮仗連環爆 極之唔尋常

特首辦主任譚志源同政制及內地事務局局長林瑞麟尋日下午四時喺政府合署西翼大堂開簡報會，交代副局政助凍薪決定，圍繞住呢個政治炸彈，前後幾個鐘內，港府嘅重大消息好似燒炮仗咁，噼嚦啪咧連環爆，情況相當唔尋常。

首先，中午十二時十八分，廣管局出稿，裁定民建聯畀錢贊助嘅商台節目《十八仝人愛落區》同民主黨副主席劉慧卿喺電台呼籲市民參加普選大遊行嘅廣告均違反電台業務守則，各罰三萬元，呢單嘢已夠政治版記者有排做。點知十分鐘後，政府公布委任港台顧問委員會名單，新鮮出爐委員會主席黃嘉純同廣播處處長黃華麒三點鐘見記者，殺大小傳媒一個措手不及。

鬍鬚曾攞命陳 輪住出場

傳媒忙於變陣，疲於調兵之際，政府突然又話，財政司司長「鬍鬚曾」曾俊華下午四時親自發表第二季經濟數據後，隨即公布埋遏抑樓市過熱新措施。樓市問題全城關注，鬍鬚曾突然出招，隨即扯走財金界同政界嘅目光，記者未忙完，跟住金管局總裁「攞命陳」陳德霖又貢出嚟，話要交代金管局點樣配合遏抑樓市措施喎，嫌記者未做死咩！

講到呢度，可能各位讀者已經唔記得副局政助凍薪呢單醜聞，呢啲就係政府嘅陰招嘞。

譚志源係心戰室要員，有權協調各大政策出台，政府多項重大決定同政策，谷埋尋日一日之內公布，佢唔好同大家講協調失靈呀，唔會有人信架！