中環出更：陳振彬力撐青年廣場「搵食」

Bunny係青年廣場嘅常客，定期喺度舉辦研討會同年輕人交流，仲不時去幫襯食肆撐場，早幾日佢就去幫襯Palco ristorante。「Palco」嘅老闆兼行政總廚Ken Lau係個三十出頭嘅小伙子，入行十七年，由尖沙咀萬麗酒店學徒做起，之後到過尖沙咀半島酒店多間食肆工作，仲喺半島著名嘅Gaddi's法國餐廳深造五年，去年十月出外闖，喺美孚創業開咗間Mia意大利粉店，直至最近進駐青年廣場。

阿Ken話，做廚師基本條件要捱得、有耐性、聽教聽話，最重要有heart，而且對食物要有熱誠。不過，阿Ken話做廚師同開餐廳截然不同，事關管理一間較大規模嘅餐廳相當困難，由樓面、廚房、入貨、員工方面都要管理得宜，加上喺政府物業申請飲食牌相當嚴格，創業過程絕不簡單，幸好背後有「金牌經理人」黃栢高（Paco）和Bunny默默支持及提供意見。

陳振彬（右三）喺Palco用餐期間巧遇一班香港青聯成員，包括副主席鄭重科（左三）及許華傑太太黃夢瑩（右二）。

「太極樓」老闆阮丹蕾（左一）與魏國熙（左二）都係年輕創業人士，陳振彬（右）當然要到場打氣啦。

主攻年輕人市場 價錢相宜

當晚阿Ken為Bunny悉心炮製多味精選菜式，包括黑松露野菌忌廉湯、鮮蟹肉番茄牛油果沙律、澳洲塔斯馬尼亞（Tasmania）生蠔、龍蝦米多配魚子意大利麵、青蘋果鵝肝、紅酒燴極黑和牛面珠、低溫慢煮雞胸及油浸雞髀，仲有甜品朱古力梳乎厘，Bunny食完讚不絕口，話絕不遜色於城中著名嘅意大利餐廳。眾多菜式中，最有特色係低溫慢煮雞胸及油浸雞髀，雞隻與濃湯放入真空袋長時間低溫慢煮，雞肉分外嫩滑，將雞皮煎脆更回味無窮。

以上菜式要兩日前預定，餐牌嘅菜式就經常提供，價錢相宜，主要照顧年輕人消費能力。Bunny用餐時遇到好多朋友，除咗身為Palco ristorante搞手之一嘅金牌經理人黃栢高Paco，仲撞到原香港青聯主席許華傑太太黃夢瑩同一班青年朋友喺度聚餐，香港青聯副主席鄭重科則與友人到「太極樓」京滬飯店食飯，呢度果然係青年人聚腳嘅地方！

香煎鵝肝配青蘋果	低溫慢煮雞胸及油浸雞髀	「太極樓」小籠包

卓妮