茵母歷盡悲喜奇迹圓夢
「我喺病床邊一張開眼，見到茵茵對住我笑，我就知道佢過到呢一關！」茵茵母親陳琼茹坦言，陪同愛女遠赴台灣治病的十一天，心情猶如坐過山車，尤以茵茵手術前一天突然感染肺炎並發高燒，徘徊生死邊緣，更令夫婦倆的情緒跌至低谷，幸而茵茵憑着超強生命力闖過每道難關。蔡太指各界對茵茵的關愛，讓他們感到人間溫暖，並再三向所有曾幫助茵茵的善心人表達感激之情，承諾一家人會堅強勇敢面對前路，不負眾望。
聞肺炎發燒 好驚好心痛
「好似發緊夢咁，過去呢廿幾日，所有嘢都發生得好快。」蔡太憶述約一個月前向本報求助，籌募赴台治療經費，初時心情仍飽受這次女兒的遭遇煎熬，「好似每一日都過得好慢咁，一直喺度等消息，好想時間快啲過。」本報報道茵茵的病況後，隨即引起廣大讀者共鳴，各方捐款如雪片飄至，令蔡家感到前路再現曙光。
經各方努力籌劃下，茵茵終在本月二日踏上赴台治療之旅，蔡太指茵茵抵台時身體狀態仍然不錯，只是對陌生環境不太適應，「佢住咗醫院咁耐，已經識得點認醫生同護士，佢一見台灣啲護士着紫色制服，同香港護士唔同，就驚到喊咗出嚟；但係見到台灣啲醫生都係着白袍，就即刻收聲唔喊。」
就在茵茵父母滿以為難關即將過去時，茵茵卻在手術前一天的深夜突然發高燒及呼吸困難，緊急檢查後證實患上肺炎，需緊急置入支架，「嗰一刻真係好驚，好心痛。」
剪存報道待長大後細閱
幸手術最後順利完成，蔡氏夫婦之後數日均寸步不離地守候在茵茵病榻旁邊，「記得手術之後兩日，我喺床邊瞓着咗，一睜開眼就見到茵茵對住我笑，仲好活潑咁郁嚟郁去，對腳仔踢下踢下；佢去咗台灣咁多日都無笑過，到嗰一刻我就知佢身體已經舒服番。」
蔡太指今次全賴廣大善心讀者慷慨捐款，茵茵才可順利康復，他們已剪存連日來有關茵茵的報道，待茵茵長大後，必定會讓她細閱剪報，並告訴她這段不平凡的經歷，讓女兒學懂心存感恩，日後回饋社會，「咁多人送上咗咁多愛心，茵茵真係接收到㗎！BB真係好有福氣，有咁多人支持佢。」