假如可以時光倒流，功夫茶回到過去做番小六學生，應該係一件非常過癮嘅事。事關家陣出生率好低，適齡學童買少見少，中學收生問題十分嚴峻，一話收唔夠學生開班隨時執笠，成為席捲全城殺校潮嘅另一個犧牲者。亦即係話，準備升中嘅小六學生就好似大豪客咁極之搶手，完全可以托住個雀籠大搖大擺揀學校，左揀揀，右揀揀，揀完唔啱再揀過。
事實上，目前有好多學校為求自保，紛紛絞盡腦汁積極「拉客」。有人掛橫額，有人派傳單，甚至乎有人去到商場擺檔宣傳，可想而知競爭係幾咁激烈。功夫茶思疑，以後或者會有學校提供專車管接管送，話唔定送埋免費午餐，務求招得一個學生就係一個。當然啦，學生上課期間應該唔會有按摩服務啩。
矜貴嘅學生哥就話過癮啫，掉番轉頭嚟諗，教育工作者就慘情嘞，一個唔覺意任職嘅學校殺鬼咗，飯碗不保o架。所以咯喎，憂心如焚嘅香港教育專業人員協會日前約見教育局局長孫明揚，表明學界反對殺校嘅訴求。教協又提出降低中一開班人數等等建議，希望由現時三班六十一人嘅底線，降至兩班四十二人。
既然學界理所當然咁反對殺校，孫公有乜回應呢？教育局尋日就話嘞，考慮暫緩殺校一年，孫明揚同意今年收生不足嘅中學保持現狀，以便局方再與辦學團體、家長、學校研究解決問題。
問題可以點解決？適齡學童買少見少係鐵一般嘅事實，雖然曾蔭權大聲疾呼要求香港人「最好生三個」，可惜人人當佢發噏風，喺「粥多僧少」嘅持續狀態之下，防止殺校真係冇計喎。
拖得就拖嘅緩兵之計唔係話冇，你當然可以推行小班教學啦，你又可以將學校合併啦，甚至乎你可以將收生最低標準降到「一人一班」，可惜全部都係治標不治本。
計功夫茶話齋，徹底解決問題嘅辦法唔止要搞好教育政策，最重要係必須切切實實搞好民生政策，因為收生不足嘅關鍵所在就係生活環境惡劣，嚇到香港人唔敢生仔，冇人為你提供學生，學校梗係拍烏蠅啦。
香港人之所以唔敢生仔，原因多方多面，一來樓價貴到冇朋友，生完仔唔通叫佢瞓天橋底咩？二來物價又貴到飛起，生完仔唔通又叫佢唔飲奶咩？三來咯喎，教育制度失敗成咁，讀完小學未必識得晒二十六個英文字母，讀完中學又未必噏得出中國四大發明，最恐怖係送個小朋友返學好似送羊入虎口，一個二個索Ｋ索到阿媽都唔認得，轉個頭送去正生書院戒毒嘞，吖，爆棚冇位喎。
所以話啫，特區政府一日唔做好呢份工，民生政策繼續亂七八糟，收生不足嘅問題一日都冇可能解決，殺校拖得一時唔拖得一世。
總之簡單一句，想救校？生仔啦！