政情：張文光睇曼聯焗蒲吧
酷愛旅行嘅民主黨立法會議員張文光，今個暑假因為美孚嘅屋企要大裝修，所以搬咗去汀九汀蘭居暫住，飽覽汀九風光當旅行。不過離開屋企對身為曼聯迷嘅張文十分不便，事關汀蘭居無英超睇，張文惟有密謀喺荃灣區搵一間有波睇嘅酒吧，實行有波就落吧睇！
張文屋企今個月頭大變身，呢個項目全權由張太負責，張文連間屋會變成點、使咗幾多錢都話唔知，一切交由由太太話晒事喎。
前排紅魔喺英格蘭社區盾大戰車路士，滿心歡喜嘅張文買定薯片、啤酒等睇大戰，點知到開賽時間電視仲播緊體操，經過一番查問之後先發現原來根本睇唔到波。深深不忿嘅張文鍥而不捨，攞住部iPhone睇文字直播睇足九十分鐘，好在最後紅魔三比一大勝車仔，如果唔係佢好可能非常揼心。
睇完波飛的士返屋企
張文屋企下個月先裝修完，嚟緊幾個星期曼聯喺英超都有賽事，張文正物色荃灣區有波睇嘅酒吧，實行一有波踢就去蒲吧，最多睇完搭的士返汀九，果然係超級波迷！