港府喺回歸後一直忽視台港關係，近年兩岸吹暖風，關係大幅改善，港府又再犯後知後覺嘅錯誤，拖到今年三月底先成立一個由財爺鬍鬚曾擔任榮譽主席嘅半官方機構港台經濟文化合作協進會，專責同台灣合作交流，已經畀人批評港府執尾攤，跟住即時生咗個ＢＢ，喺協進會轄下成立香港——台灣商貿合作委員會，由全國政協委員李大壯做主席，又畀人批評係政治酬庸。協進會成立至今逾四個月，都冇乜嘢做過？
雖則係咁，港府尋日又突然間宣布協進會又生多個ＢＢ，就係成立港台文化合作委員會，被委任入委員會嘅合共有十一個文化藝術同創意產業界人士。
召集人係亞洲演藝研究創辦人及總監毛俊輝，委員包括喺柏林影展攞咗水晶熊獎《歲月神偷》做監製嘅張婉婷及曾經鬧爆西九文化區規劃嘅進念．二十面體行政總裁胡恩威等。港府仲話呢個委員會將會發揮四大功能，完全係高大空。係人都知，評估表現，唔係睇生多幾多個ＢＢ，唔知呢個委員會會唔會又再生幾個孫呢？