政情：「飛bra男」北角鬥蔡菜子
政改方案過關，明年舉行嘅區議會選舉，被視為二○一二年立會選舉嘅前哨戰，各黨各派寸土必爭。泛民協調過後，已各自劃好地盤，但近二百個被視為「建制票倉」嘅選區，泛民黨派可能唔想屢戰屢敗，決定舉白旗棄戰。社民連吼準呢啲冇人爭嘅「賣剩蔗」，傾巢派人去呢啲選區狙擊民建聯，更鎖定三個選區重點出擊，包括派出「飛bra男」錢偉洛到北角錦屏單挑蔡素玉，勢要玩寸個party！
民記蔡菜子喺東區錦屏扎根多年，上屆只得一名福建幫同佢撼，令佢不費力氣順利當選。明知輸梗，據聞泛民重量級人士無人肯去撼，社民連一於決定派飛bra男錢偉洛同佢鍊過。係人都知飛bra男勝出嘅機會近乎零，社民連今次擺明玩嘢。社民連仲打算派人狙擊鎮守中西區觀龍多年嘅葉國謙，同埋油尖旺富榮嘅鍾港武，但人選就未敲定。社民連主席陶君行講得都算坦白，佢話明今次唔計較輸贏，只當為嚟緊嘅立會選舉練兵喎。