教育局無時無刻都諗緊向收生不足嘅中學殺校，雖然局方今年先後提出多項救校誘因，可惜無乜學校參與，局長孫明揚上月於是出言警告全港中學唔好「敬酒唔飲飲罰酒」，咁重江湖味真係嚇親好多校長，搞到要考慮召開申訴大會同遊行添！可能孫公見勢色唔對，尋日突然宣布暫緩殺校一年，讓收生不足嘅中學保持現狀，仲話會搵出一個較圓滿嘅方法解決問題喎。