政情：藐視論捱批余若薇死撐
公民黨黨魁余若薇日前公開表示，市民透過遊行示威，抗議終審法院常任法官包致金姪女Amina獲輕判，有可能構成藐視法庭罪。呢番靠嚇言論，隨即引起全城公憤，遭網民狂轟，批評佢散播白色恐怖同打壓言論集會自由。不過言猶在耳，余若薇尋日又喺一份自稱「公信第一」嘅報章上發表評論文章，繼續為言論死撐。最弔詭嘅係該篇文章嘅標題正係：「余若薇：有錢人大晒呀？」如果喺「有錢人」同「大晒」中間加多「真係」兩隻字，就更加貼題！
連日來多名法律界人士同學者公開反駁余若薇嘅「藐視論」，但本身係資深大律師、仲做過大律師公會主席嘅余若薇，尋日繼續喺文中死撐，指強烈針對法官判決嘅攻擊，可以被判藐視法庭罪行，甚至會影響司法獨立；又暗批案件令社會湧起「有錢人大晒」嘅情緒，加劇香港近年瀰漫嘅「仇富」氣氛。
其實余若薇喺文中都認咗啦，「有錢人打官司，喺聘請代表律師時有較多選擇同優勢，令法官較有耐性聆聽有錢人嘅理據」。咪係囉！如果唔係多得班有錢人出巨額律師費，又邊有人請得起余若薇佢哋呢班大狀打官司呀！
內地過去亦發生過不少冤案，經傳媒廣泛報道同網民群起關注後，當局才正視問題，重新調查同翻案。今次呢單摑警案同呢類內地冤案相似，都係經傳媒同網民嘅高度關注後，政府當局先肯提出上訴。余若薇發表「藐視論」，莫非要叫全港嘅小市民啞忍？
99及05年遊行挑戰人大常委會
心水清者應該記得，余若薇等一批本港法律界人士，包括多名依家做咗佢黨友嘅公民黨立法會議員，曾經喺九九年及○五年發動「黑衣遊行」，分別抗議全國人大常委會就居留權案及補選特首任期進行釋法。須知《基本法》同《中國憲法》都有明文規定人大常委會有權釋法，權威性形同回歸前嘅英國樞密院，余若薇等呢班大狀公然遊行示威挑戰人大常委會，又有冇構成藐視人大常委會同損害法治？依家班網民為包致金姪女案嘅判決上街表達不滿，余若薇就話可能觸犯藐視法庭罪，咁唔係「雙重標準」又係乜嘢？簡直就係「只許州官放火，不許百姓點燈」！
發起周日遊行嘅盧先生尋日就喺facebook回應余若薇嘅文章。盧先生狠批話：「你要選票時咩遊行都得，當涉及你們行業嘅利益就放市民上枱！」暗批余若薇「雙重標準」。所以，無論過去以咩理由投過票畀余若薇等大狀政客嘅選民，下次選舉時真係要帶眼識人囉！