中環耳目：鄭國屏推介中總鹹蛋豬腳薑
中華總商會會員俱樂部嘅地道粵菜一向備受歡迎，做咗中總會董十年嘅太平保險（香港）副董事長兼行政總裁鄭國屏，就好鍾意喺度開飯，鹹蛋豬腳薑、玫瑰燒鱔片同埋柚皮鵝掌都係佢至愛，最緊要仲係呢度嘅出品冇味精、少油，啱晒健康潮流！
早前鄭總約咗太平保險香港區總經理陳沛良喺度食午飯，兩人密斟下半年發展大計，尤其是出售民安（中國）一事已進入最後階段，梗要
實啲。鄭總推介嘅佳餚之中，以罕見嘅鹹蛋豬腳薑最特別，估唔到鹹蛋與甜醋相遇後，鹹蛋嘅鹹味全消，咬落又比雞蛋鬆化甘香，別具風味。呢味傳統美食原來係已故中總榮譽會長葉若林引入嘅，甚受非富則貴嘅會董們歡迎。聽聞每周三立法會開會時，立法會議員黃宜弘梗會柯打幾煲同大家分甘同味。
鄭總笑謂，保險界立法會議員陳健波都鍾意喺度食玫瑰燒鱔片，但亞洲保險總裁陳智思就鍾意落豉汁蒸，兩種食法各有千秋。中總廚部主管朱卓如師傅話，玫瑰燒鱔片係用玫瑰露浸過，等佢入味啲，再加啲日本醬料、魚露等，煎到少少起焦後再炸過，所以保持到外皮爽脆但肉質腍香多汁，口感一流。
卓妮