中環出更：蔡加讚買殼有心得
玩具大王蔡志明愛兒蔡加讚（Karson）稱得上潮人玩潮物，除咗迷上意大利林寶堅尼跑車外，仲係Apple電腦擁躉，屋企電腦用晒iMac，手機唔使講就梗係用iPhone 4啦，再加多部BlackBerry做支援。Karson兩部手機都披上綠色「外衣」，非常搶眼，原來綠色係Karson嘅至愛，唔怪得佢鍾意《反斗奇兵3》入邊嗰隻綠色泡泡龍喇！
由於iPhone 4唔換得機殼，Karson惟有買個綠色保護機套包住頂檔，反而佢就為部BlackBerry買咗有顏色嘅機殼更換。Karson話，美國有間公司專做BlackBerry嘅手機殼，質素有保證，比起啲雜廠嘅機殼好好多，佢仲好有經驗話：「我哋做開玩具嘅，一攞上手睇吓就知道啲機殼質料好唔好啦！」
記得iPhone 4推出當日凌晨，好多人都蜂擁去排隊購買，Karson都唔例外，凌晨叫咗司機去買機。不過，呢部並非Karson擁有嘅第一部iPhone 4，原來佢早前已急不及待託人喺外國買咗幾部水貨機回港，分畀屋企人使用，點知轉過頭香港就推出行貨，於是拿拿臨叫人放晒幾部水貨機，佢話改用行貨先至有保證喎！
卓妮