中環出更：麥瑞琼試新裝夠冷靜唔衝動
中環置地廣場係名媛淑女「朝聖」天堂，連香港零售管理協會主席麥瑞琼（Caroline）都係常客。芸芸名牌之中，凸顯法式高雅氣息嘅「巴黎世家」（Balenciaga）就好得佢嘅歡心，前日下午偷閒去試新裝，見到靚衫，忍唔住要試上身！
人稱「零售管理一姐」嘅Caroline，形象硬朗中富型格，但亦有小女人一面，前日下晝五點幾趁有個小空檔，快步走入「巴黎世家」「檢閱」新裝。Caroline當日穿上鮮紅色外套，手挽黑色LV新款手袋，潮得嚟不失高雅。
懶理人頭湧湧
入到店內，Caroline主攻行政人員套裝，眼尾瞄到衣架上有一套別致嘅黑白橫間套裝，腦袋即時「叮」一聲醒神晒，拿拿臨走入更衣室試身。店內人頭湧湧，但Caroline唔理咁多，着晒新裙走出舖頭大鏡前睇真啲。橫間衫幾蝦人着，「一姐」天生纖瘦，carry得綽綽有餘。
Caroline對新裝頗滿意，左照右照，一度托埋下巴諗真啲。卓妮八到，件上衣標價一萬六千九百元，條裙就賣四千九百元，諗真啲都有道理。買衫最怕係一時衝動，Caroline決定唔買住，轉身換番衫走人。卓妮追上前同佢打招呼，佢都有啲意外。
卓妮問佢點解唔扑錘買剛才試身嗰條裙，Caroline就解釋話：「睇唔啱囉。」Caroline着衫有自己一套心法，返工首選Chanel套裝，喜歡佢高貴大方，永無失手喎。
講番法國名牌「巴黎世家」，其服裝以精於縫製見稱，斜Cut是其拿手好戲，擅長以此起彼伏嘅流動線條凸顯人體美感，將曲線盡展現，深得西班牙、比利時及摩洛哥皇室貴族捧場。
卓妮