政情：吳斌攞完彩踩蔣任宏

個人資料私隱專員吳斌離任前狂開快車聲討八達通事件，畀人質疑佢唔跟規矩爭住攞彩。尋日係吳斌最後一日以私隱專員現身，佢都把握最後機會，借電台節目為自己開脫，不過佢否認搶咗候任私隱專員蔣任宏嘅工作嚟做，又提到上任後留意到好多涉及私隱並受到市民高度關注嘅事件，包括用隱蔽式攝錄機監察員工，暗寸出任郵政署長期間、爆過用針孔攝錄機偷拍郵政局員工嘅蔣任宏，臨走前都踩多下手兩腳。