政情：沈祖堯「滿月」談感受
身為教育界嘅中文大學校長沈祖堯尋日罕有地喺香港警察學院出現，原來獲邀主持結業典禮，即使大熱天時喺操場上檢閱畢業生都表現輕鬆，仲親手頒獎畀兩位中大「出產」嘅傑出督察同警員，其中一個仲係逸夫書院畢業生，難怪作為前逸夫書院院長嘅佢零舍興奮。
沈校長又主動透露自己上任中大校長一個月，都算係「滿月」喇，佢覺得校長工作充滿挑戰，特別多咗機會同學生、學生會同教職員溝通，相信有助促進彼此嘅信任同了解。佢話未來將要應付多項挑戰，好似中大將來發展時所需嘅資源，言下之意要面對籌款問題，又話喺三三四新學制下，預計會突然多咗好多學生，可能會帶來宿位問題。佢強調未來都會保持「親民形象」，繼續加強師生溝通咁話。
不過，當問到有關新民主女神像如何處置，沈校長即刻擰轉頭趕住走人，睇嚟做中大校長都認真唔容易！