政情：梁君彥唔吼iPhone 4
iPhone 4面世後，好多潮人爭住搶購。不過「潮機」未必人人愛，經濟動力梁君彥（Andrew）就話唔吼呢部機，因為用唔着喎。唔揀iPhone 4，但Andrew上星期就入咗部iPad，下載立法會文件搭車時睇，效率十足，開立法會攞部iPad入去就搞掂，即時輕鬆晒。前日中午食完午飯，我哋就撞見Andrew喺立法會停車場嘅座駕上玩iPad，睇得好入神，原來係睇緊當日嘅新聞報道。佢嘅電腦書籤上，當然唔少得東方報業集團網站《on.cc》喇！
既然用得iPad，咁會唔會買埋新鮮出爐嘅iPhone 4呢？Andrew搖搖頭話唔會喇，仲自嘲係「打出打入一族」，既唔用手機拍片，多媒體手機功能亦懶得掂，即使有部iPhone 4在手，都係用唔着喎，依家佢隨身帶部iPhone 3GS同iPad，夠晒用喎。
至於用舊咗嘅手機，Andrew堅持唔賣，原來係擔心手機內嘅電話號碼及資料被刪除後，仍然有機會被還原，賣出街分分鐘出事，所以佢屋企收埋好幾個舊電話喺櫃桶底。認真有安全意識！