政情：IT代表唔買iPhone4
行貨iPhone4於今日凌晨起喺香港開始發售，除咗一眾粉絲同IT發燒友，好多其實唔係好識IT嘅潮人都熱烈追捧，貪佢夠晒型仔。不過IT潮人香港互聯網協會主席莫乃光就堅決唔買，點解今次佢會咁out呢？
用開iPhone3G嘅莫乃光解釋，iPhone4部分零件雖然升咗級，但其實將iPhone3G嘅軟件升級後，已經做到iPhone4嘅七、八成功能，加上佢早前已經買咗另一部同樣熱賣中嘅Samsung Galaxy S智能手機，為免浪費，所以暫時唔會跟風購買iPhone4，等日後推出iPhone5先再考慮換機。
莫乃光雖然冇捧iPhone4場，但係就有購入同樣由蘋果電腦出品嘅iPad。行貨iPad上星期先喺香港推出，不過佢早喺兩個幾月前，已經託朋友喺美國買咗部水貨返香港用。佢大讚iPad上網同睇片都一流，不過文書處理系統就差少少，只認得簡體字，對於慣用繁體字嘅香港人唔太方便，尤其佢成日會喺報章上發表評論文章，用繁體字嘅機會非常多，對佢嚟講iPad仲未可以取代到一般手提電腦。