政情：白姐姐隨夫「唱」旅議會
導遊阿珍辱罵內地旅客兼強迫購物，搞到滿城風雨。一直視旅遊業議會為眼中釘嘅立法會旅遊界代表謝偉俊（Paul），尋日喺城市論壇勁插旅議會理事清一色係旅行社老闆，自己人管自己人，要徹底改革入境團監管制度先可治本。
勁插自己人管自己人
阿Paul嘅「跟得夫人」白韻琹亦一身pink lady打扮去撐場，即席示範乜嘢叫夫唱婦隨，即使直播節目完咗，加時都要舉手發言。白姐姐話佢屋企三代都做旅遊，當年旅議會成立佢喺背後出咗唔少力，真係唔講唔知喎！佢仲咬牙切齒咁鬧旅議會成日收埋啲旅行社會費同導遊證費，「又食又拎又監管……」主持即刻打斷佢、問有監管咪好囉，點知白姐姐一於少理，繼續話旅議會「廢嘅」，出咗事先出嚟講吓！
畀謝氏夫婦上下夾攻，旅議會主席胡兆英氣定神閒接招，話成日有同會員溝通，依家要諗計挽救旅遊業聲譽，唔係傾自己人唔自己人嘅時候。去年底阿Paul嘅恩師侯叔祺想爭旅議會理事同主席，點知連理事都選唔到；今次謝氏夫婦上下夾攻，唔知侯叔祺點諗？
