政情：鍊贏小辣椒 任亮憲當選行委
社民連尋日舉行特別會員大會，就行政委員會空缺進行補選，今次係「維園阿哥」任亮憲對撼未夠廿歲嘅「社民連小辣椒」嚴敏華，事前是非多多，最終任亮憲以九十四票鍊贏得到七十三票嘅小辣椒，坐上行委之位。二人就話贏輸唔緊要，最重要係呢場補選充分體現社民連民主嘅精神喎！
任亮憲因成功活化城市論壇而人氣急升，小辣椒就試過痛罵一個八十後就六四發表嘅言論被控刑事恐嚇。喺今次選舉前，有指黨內大量年輕會員不滿任亮憲成日周圍亂講嘢，所以喺網上群起撰文撐小辣椒，而任亮憲就有創黨主席黃毓民撐腰。
任亮憲今次僅以廿票贏小辣椒，險過剃頭。佢話做咗行委後，將積極為黨帶來新思維。輸咗嘅小辣椒就話，唔覺得自己輸咗，事關有競爭先有進步；仲話希望佢嘅支持者可以善待任亮憲，都算有大將之風。