政情：CY書展簽名會 陳茂波現身撐場
會計界立法會議員陳茂波（Paul），被傳與疑似特首候選人、行會召集人梁振英（CY）關係密切，佢曾公開否認，話一切只屬傳聞。不過唔認歸唔認，當CY需要支持時，阿Paul梗會現身，好似尋日CY喺書展搞新書簽名會兼座談，阿Paul就現身撐場，唔知呢啲算唔算係「猶抱琵琶半遮臉」？
張震遠聽完講座先走
CY本新書叫《假如是你的子女》，唔好誤會，唔係講教仔，文章主要講貧窮同香港新一代出路嘅問題。市建局主席張震遠聽完CY嘅講座先至走，撐足全程，佢話同CY係朋友，所以嚟支持。婦女事務委員會主席高靜芝更買埋書叫CY簽名，話係CY忠實讀者。問及特首人選，高靜芝當住CY面講，支持有承擔、有能力同關心香港嘅人。唔知CY中邊瓣？
阿Paul就讚CY嘅文章夠潑辣，有深度，睇完要思考一陣先知講乜。阿Paul連CY嘅文章都睇得咁通透，話同CY唔熟，邊個會信？俗語有云：「槍打出頭鳥。」阿Paul遲啲露底都好正常。