中環耳目：台灣水果入菜食到舔舔脷
台灣水果喺香港愈嚟愈普及，夏季時令當造，正係大快朵頤嘅季節。負責推廣嘅台北貿易中心專登喺台灣空運十三種時令水果來港，上周五起至下月二日，喺彌敦道永安百貨舉行一年一度嘅台灣優質水果夏季特賣活動。台北貿易中心董事總經理劉錫威好有心思，情商酒樓以台灣水果入菜款待賓客，其中一道「楊桃清燉斑骨湯」食到大家讚不絕口。
當日喺酒家筵開兩席，大厨以香甜嘅金鑽鳳梨炮製「鳳梨西芹炒帶子」，口感一流嘅愛文杧果同糯米糍荔枝就炮製成「香杧卷拼香荔蝦仁」，其中以龍躉斑骨、雞腳、豬肉、瑤柱同些少薏米一齊燉嘅「楊桃清燉斑骨湯」最精彩，鮮甜無比。劉錫威話，台灣楊桃喺香港全年有售，楊桃具有清熱功效，甚受市民歡迎。
新上任嘅遠東貿易中心主任陳光丕當日亦現身撐場，佢係台灣經濟部駐港代表，梗要鼎力支持促進台灣出口活動喇。佢又教大家點樣吃台灣西瓜，仲話太太會攞剩低嘅西瓜皮嚟敷面，佢都會敷埋一份添。一句講晒，物盡其用！
