中環出更：高靜芝戴Bertolucci襯絕
愛美，乃女人嘅天性。婦女事務委員會主席高靜芝（Sophia）都係愛美之人，次次出席公開場合都經過悉心打扮，令人眼前一亮。卓妮經常向佢請教扮靚心得，有次見佢戴住價值六萬元嘅Bertolucci玫瑰金鑽石錶，傾開先知原來大部分靚錶都係老公所贈，不過當日嗰隻咁啱係自己買嘅，貪佢容易襯衫喎！
Sophia話平時行街買衫鞋從來唔嫌嘥時間，但係佢好少行錶舖。佢甜絲絲話，老公對手錶一向好有研究，鍾情經典款式，每次買開錶實會買多隻送畀佢，咁就可以夾埋做情侶錶啦！所以佢自己唔多買錶。
至於當日戴住嘅Bertolucci，係有日行街時見到幾啱眼緣，所以諗都唔諗就立即扑錘買咗。源自瑞士嘅Bertolucci女裝錶，專門為女士配搭時裝而設計，即使同鮮艷奪目嘅時裝一齊配搭，亦都可以戴出自家風格。
Bertolucci由原籍意大利嘅鐘錶大師Remo Bertolucci同來自瑞士錶匠家族嘅太太共同創立，將意大利嘅浪漫同瑞士嘅精確完美結合，難怪渾身散發貴婦氣息嘅Sophia咁鍾意。