中環出更：許浩明養馬悟做人道理
馬季已於月中煞科，一眾勞苦功高嘅馬仔可以開心放暑假。來自新西蘭嘅七歲靚駒「甜蜜至上」仲開心，事關佢嘅主人、香港資源執行董事許浩明（Herbert），喺煞科賽翌日帶咗一大兜紅蘿蔔嚟探佢，佢食到猛咁點頭，真係恨死同廐嘅馬仔朋友啦！
當日卓妮約咗朋友喺沙田馬會會所中菜餐廳食晏，見到Herbert同私人助理都喺度食點心，原來佢準備飯後去馬房探隻愛駒「甜蜜至上」。講起隻馬Herbert就好開心，仲話養馬令佢感悟唔少做人嘅道理。
咪睇「甜蜜至上」依家識跑識跳，仲喺沙田日馬煞科賽中勇奪第二，其實佢三歲來港，但頭三年因腳患好少出賽，有段時間仲只係日日游水治療腳患，連朋友都笑Herbert癲咗，問佢怕唔怕隻馬浸得水多變「棉花腳」，又教佢索性放棄，送佢返新西蘭罷啦！
愛駒受傷不離不棄
Herbert好信任練馬師吳定強嘅治療方法，事關佢自己都係風雨不改日日游水，深知游水對身體嘅好處；加上佢覺得馬係有靈性嘅動物，如果輕言放棄，隻馬會好傷心；佢更加尊重隻馬有競賽嘅權利，所以一直不離不棄，而「甜蜜至上」終於不負所望，今季愈戰愈勇，令許浩明喺五月一嘗拉頭馬嘅滋味。
其實Herbert嘅人生經歷亦充滿戲劇性，佢做過港交所副行政總裁，但後來出任海域集團副主席時，集團因資金不翼而飛爆煲，Herbert坦言嗰段時間係佢人生最黑暗嘅日子，但佢咬緊牙關留低協助收拾爛攤子，終於令公司成功重組為香港資源，仲收購咗金至尊珠寶。最近金至尊獲評選為「中國500最具價值品牌排行榜」第一百八十二名，品牌價值達四十八億元人民幣，Herbert同一眾新股東都飲得杯落啦！
卓妮