蔡父成功辦證陪茵茵赴台

茵茵現仍在廣華醫院深切治療部留醫，主診醫生吳國強指茵茵情況良好，沒有發燒或受感染。茵茵早前被發現血液於晚間含氧量偏低，經過兩晚加注氧氣及觀察後，含氧量已回復正常。

重咗兩磅 茵媽開心

不過，吳醫生仍擔心茵茵容易受病菌感染，醫護人員需繼續緊密照顧，而赴台的運送過程亦需經周詳考慮，他會繼續與「國際SOS」及台北榮民總醫院保持緊密聯絡，稍後會再開會討論赴台細節。

「今日幫囡囡磅過重，有十五磅啦，比之前重咗兩磅，雖然仲係比平常嘅BB輕，但我哋都好開心！」剛探望茵茵的蔡太表示，茵茵現只能依靠胃喉進食，吸收營養較緩慢，而茵茵又經常「手多多」扯脫胃喉，「囡囡塊面黏住太多喉，成日好痕想整開佢，我同阿媽見到，都要細細聲同佢講唔准！」對於連日各方善長捐款，蔡太表示萬分感激。

蔡太透露，丈夫會於今日返港，預計周五取得護照，由於他最懂得茵茵脾氣，希望赴台期間丈夫可全程陪伴在側，「茵茵一唔開心就影響健康，到時有爸爸陪住可以即刻令佢笑番！」

善長對茵茵的關懷亦未有減退，於中東工作的范先生透過長途電話，查詢茵茵最新情況及捐款事宜，「我上網見到茵茵啲相，知道佢好需要協助，雖然遲咗少少，但都好想幫手！」有宗教信仰的Dor更親自來函，希望上天眷顧可愛的茵茵，渡過難關，「茵茵是一個可愛的孩子，我會繼續為她祈禱，請繼續支持下去！」

東方日報慈善基金與太陽報愛心基金現已為茵茵籌足赴台之治療費用，善長繼續捐助的善款將會作為茵茵長遠治療所需。讀者如有查詢，請致電3600 9988與本報記者聯絡。捐款編號：11933

記者梅可茵

愛心承諾

查詢電話：1,167個

累積捐款：$1,375,608.7

‧謝小姐：「雖然我依家窮啲，捐錢比以前少咗，但都希望集腋成裘，幫到茵茵！」

‧黃太（居於澳門）：「無論喺香港定澳門，都有好多市民關心茵茵，希望佢快啲醫好個病！」

‧盧太：「我個細路見到茵茵啲相，話好可愛，要用自己零用錢捐畀佢喎！」