中環出更：田北俊驚林健鋒浸親？
做兄弟嘅嘢，和而不同最緊要。好似田北俊同林健鋒咁，兩個曾經係親密黨友，不過○八年立法會選舉後，林健鋒離開自由黨，之後仲孖埋退黨嘅梁君彥同蘇菲梁另組經濟動力，從此兄弟見面當堂少咗好多，不和傳聞亦不絕於耳。不過男人做大事，心胸唔撐船都放得落幾條龍舟。
「啲水咁污糟」
尋日由香港龍舟協會主辦嘅「香港龍舟嘉年華」舉行揭幕禮，田少做主席嘅旅發局有份合辦，所以同贊助今次活動嘅盛事基金評審委員會主席林健鋒同場出現，佢哋有講有笑，田少見太陽曬，即刻拉埋林健鋒一齊企過去騎樓底避陽光。之後佢哋行過去岸邊，同金至尊主席黃英豪及副董事徐傳順，一齊幫多艘金至尊贊助建造嘅全新龍船進行傳統醒龍儀式。
唔知係咪啱啱打完風，海面漂滿垃圾，向來細心嘅田少竟然對住林健鋒衝口而出話：「啲水咁污糟，跌落水浸死你！」田少突然嚟呢句，熱到心口都濕埋嘅林健鋒，㷫到無表情，無答嘴。不過講得出咁嘅說話，證明佢哋嘅交情都去到百無禁忌地步。林健鋒話佢哋盛事基金嚟緊都會籌備好多大型活動，希望吸引多啲遊客嚟香港。