政情：克勤仔暗寸煲呔曾
煲呔曾喺政改方案通過之後，向民建聯大派高帽，不過呢招未必人人受落，好似民記立法會議員陳克勤日前帶隊新界青年聯會到北京上國情研習班，都不忘暗踩煲呔曾。克勤仔話，佢問授課嘅「新護法」王振民，喺政改一役，煲呔曾嘅參與度係咪唔多夠呢？新護法唔敢亂答，只係數番政改「五部曲」，但相信佢心裏有數，知道克勤仔其實暗寸緊煲呔曾「廢廢哋」。
愛踩煲呔曾嘅又何止民記人？煲呔曾前日喺答問大會引用一句法文「Honi soit qui mal y pense」，叫狠批佢嘅社民連三子收聲。民主黨李華明尋日話，大學年代讀過一年法文，識講兩嘴，但係前日煲呔曾對社民連惡言相向時，完全唔覺煲呔曾講緊法文囉，反而立法會主席重複讀出嗰一句仲似啲，明寸煲呔曾亂拋書包。
令煲呔曾自暴其醜嗰句法文，意思係「言行惡毒會自食其果」，煲呔曾鬧人變被人窒番轉頭，唔知算唔算自食其果呢？