政情：勞工界唔妥張建宗
最低工資條例草案喺立法會休會前恢復二讀及三讀，勞工及福利局打定如意算盤，仲千方百計繞過勞工界嘅障礙，將勞工界爭取一年一次檢討、同豁免暑假實習生等條件都一一踢開，勝利雖然在望，但勞工界對勞福局局長張建宗同勞工處處長謝凌潔貞就好唔高興，雙方積累多年嘅良好關係亦都可能會「一Ｑ清袋」。
講白啲，勞工界認為今次中咗政府嘅奸計。事緣勞工界同謝太一向有溝通，對於勞工界今次處理條例草案嘅策略，謝太由於得到勞工界信任，所以一清二楚，點知政府「收料」後拿拿臨調整修訂程序，搞到勞工界計劃落空。
所以職工盟嘅李卓人同工聯會嘅王國興近日都怨聲載道，甚至鬧政府玩陰招。
高官同勞工界合作現裂痕已經唔係新鮮事，張建宗當年獲勞工界議員拍手稱好而喺頭上出現嘅光環，喺佢做咗三年局長之後已經冇咗，今次就最低工資立埋法，佢同勞工界之間嘅關係，更加係扣分扣到得番隻零雞蛋。