政情：梁君彥矇查查獲金章
今年七一授勳頒到亂晒龍，被批評毫無準則，赤裸裸明益自己友不在話下，就算頒畀自己人都大細超，搞到怨聲載道。好似脫離自由黨另起爐灶嘅經濟動力「4L」，都算係煲呔曾嘅老友記吖，但係就只得梁君彥（Andrew）一個獲頒金紫荊星章，反而身為動力核心嘅林健鋒（Jeffrey）就無份。點解大細超成咁？連Andrew都話唔知點解喎！
Andrew同Jeffrey同樣喺○四年獲頒銀紫荊星章，如果今年要論功行賞，照計應該一齊奪金至係，對於呢個講法，Andrew前晚參加中策集團主席馬時亨嘅「一桿入洞慶祝飯局」時話：「我唔知喎，我又唔係特首！」
不過，Andrew獲馬會大董周永健上前握手恭賀時，會心微笑連番多謝，仲笑稱：「好閒啫，上面（飯局）大把人都有啦！」咁講唔知係咪想佢嘅親密戰友冇咁傷心呢？