政情：陳祖澤離任開齋拉頭馬
馬會主席陳祖澤（John）榮休在即，愛駒「好運得福」搶先送上賀禮，尋日喺馬季最後一場煞科賽旗開得勝奪冠。John五年來未嘗拉頭馬滋味，臨走前終於得償所願。
開賽前，John先出席法國國慶酒會，巧遇「頭箍小姐」財經事務及庫務局常秘區璟智，區小姐爆八二年入政府做政務官，係由當時任職首席助理銓敍司嘅John負責教新丁，John一嚟就將十多位新人嘅姓名背到琅琅上口，記憶力驚人。「師兄」咁猛料，「頭箍小姐」都忍唔住讚句：「佢（John）真係高人嚟㗎！」John陳聽見，好謙咁話：「我得五呎一吋高，點算係高人！」
畫上完美句號
話口未完，John隻愛駒仲高，唔聲唔聲喺快活谷賽事奪冠，帶挈主人袋三十五萬幾蚊。尋日係John陳最後一次以馬會主席嘅身份出席賽馬日，臨走前拉番次頭馬威威，總算為主席生涯畫上完美句號，原來John做馬會主席以來，未試過拉頭馬。佢希望由主席位退落嚟之後，養馬運會好啲。