政情：白鴿黨迷失互聯網
廣泛使用互聯網已經係不可逆轉嘅趨勢，不過唔係人人都跟得上，立法會資訊科技界議員譚偉豪早幾日都炮轟政府喺網上嘅政策落後。除咗政府駕馭唔到網上嘅溝通技巧，原來白鴿黨唔少人都迷失喺互聯網中，主席何俊仁、李永達等喺呢個暑假要拉隊上倉頡打字急救班。不過就算識打字，都唔等如識得用互聯網溝通喎。
早排白鴿黨支持政改方案，部分「八十後」泛民支持者更加不斷狙擊佢哋。白鴿黨內部亦評估會流失部分年輕選民嘅支持，佢哋嚟緊星期日就會喺灣仔一間酒店舉辦路向營，討論同研究個黨發展嘅方向。路向營會分兩部分，第一部分搵咗一國兩制研究中心總裁張志剛同傳媒人程翔主講，相信係討論個黨將來同港府及中央嘅關係。
至於另一部分，就搵咗學者呂大樂解構「八十後」現象，明顯係針對白鴿黨流失年輕選民而來，希望修補同年輕選民嘅關係。白鴿黨立法會議員「高達」李永達尋日自爆，原來個黨好多骨幹成員都唔識玩流行嘅社交網站，而佢自己亦唔識打中文。
與80後脫節 「進修」搶支持
高達承認，佢玩社交網站只係用英文，今個暑假決心惡補，隨身帶住張印有倉頡碼嘅「貓紙」，方便隨時溫習。高達又提到，黨主席何俊仁連facebook都未必識用，而另外兩位議員張文光同李華明亦一樣唔識打中文。相比起社民連，佢哋同年輕人的確脫晒節，所以今個暑假要「進修」，希望白鴿黨亦可以出番個「馬草泥」。
白鴿黨不斷出招，講到底都係想喺社民連手上爭番啲年輕選民嘅支持。高達話，政改方案通過之後，多咗人想用白鴿黨個牌頭參選，暫時預計會派一百三十個候選人去選，但因為經費有限，成唔成事都未知。黨內暫時屬意由之前政改大戰中去咗南非睇世界盃嘅副主席單仲偕負責籌款，等佢戴罪立功，幫白鴿黨搵番啲選舉經費。
李華明尋日亦講到，個黨年底會舉行周年大會，到時會改選領導層，希望加多個副主席，暫時屬意由年輕人出任，專責處理同建立黨同年輕選民嘅關係。政改方案通過之後，白鴿黨終於醒覺到年輕選民嘅重要，希望佢哋唔好好似政府咁騎呢，開個「限時facebook」出嚟收集意見就好喇。