中環出更：五虎將攜手擺大壽
今年係虎年，商界就有五名猛虎齊齊踏入六十歲耳順之年，德昌電機主席汪穗中、偉易達主席黃子欣、富士攝影器材主席孫大倫、「婦科聖手」養和醫院義務副院長陳煥堂及從事製衣零售嘅自由黨常委田北辰幾十年老友，下月喺君悅舉行「五虎將」壽宴，邀請三百嘉賓出席。
心思請柬 仔女設計
據聞五虎將身邊嘅好友喺呢兩個月分別收到兩張請柬，一張在上月發出，希望大家預留時間參加壽宴，而日前就發出正式請柬，邀請出席八月下旬喺灣仔君悅酒店舉行嘅盛大聯合生日酒。我哋攞到兩張請柬，發現兩張都設計獨特，第一張請柬係將五人嘅童年照以漫畫形式表達，第二張就展示五人年輕時嘅俊俏臉孔，學Beatles（披頭四）樂隊咁一齊橫過Abbey Road，有型有款。
淨係睇請柬都咁有心思，原來一切安排由五虎將嘅仔女負責，五虎將只需要出席就得嘞。至於點解會選擇八月搞壽宴，據講係五人生日嘅月份同日期加埋除開所得出嘅平均數，其中有壽星公嘅生日日期由年初至年尾都有。唔知道五個人裏面有冇人咁着數，咁啱喺八月生日呢？