中環耳目：余其祥夫婦甜品店撐枱腳
瑪利諾修院學校小學部校監余黎青萍與從事牙齒美白生意嘅丈夫余其祥都係甜品癡，即使家住大埔，每逢周末揸車出尖沙咀行街，例必到海港城間Strawberry Forever甜品店撐枱腳歎甜品。
卓妮早前去尖沙咀時經過Strawberry Forever，遇到余其祥一支公喺度食甜品，佢柯打咗杯杧果荔枝凍飲同朱古力心太軟加雪糕，食得好滋味。余其祥話，海港城泊車好方便，所以經常同太太出嚟行街，行到咁上下就去Strawberry Forever坐低歎番個甜品，但當日因為太太有要事唔得閒陪佢，自己一個人都要去。
余其祥與太太余黎青萍自小青梅竹馬，而且大家都熱愛運動，成長過程中建立咗深厚感情，並結為夫婦。余太做咗幾十年公務員，到呢個月尾亦唔再出任副申訴專員，不過余太依家幫緊母校瑪利諾修院學校小學部做校監，回饋母校。不過，余其祥都希望太太可以抽時間放番個長假，同佢上郵輪周遊列國玩番夠本，享受二人世界。