中環出更：政商界熱話「湯陳戀」
廉政專員湯顯明（Timothy，即甜湯）前晚孖住前入境處助理處長陳詠梅（Helen）出席中策集團主席馬時亨嘅飯局，地下情曝光之後，旋即成為政商界熱門話題，紀律部隊內部更加熱烈咁討論，有人對卓妮講：「終於影到相啦？大家都知㗎啦！」不過，同甜湯關係密切嘅保安局局長李少光就cool到爆咁話：「呢單嘢，我都唔係好清楚喎！」
光哥用「呢單嘢」嚟形容「湯陳戀」，莫非佢當咗做案件處理？反而商務及經濟發展局局長劉吳惠蘭就索性話：「我唔識陳詠梅喎！」然後急急上車離開立法會。將個鏡頭pan入立法會，經常同甜湯交手嘅保安事務委員會副主席涂謹申知道消息之後好震驚，話唔知呢段「地下情」喎，但佢話兩人結合係好事，仲話欲知詳情，就一定要搵兩人嘅前上司葉劉淑儀嘞，事關兩人都係葉太提攜嘅！
阿涂一腳踢咗個波畀葉太，葉太會否大腳踢爆佢呢？「拍拖？我離開咗政府先至知咋，以前我哋做上司嘅，下屬做到嘢就得啦，我唔理下屬嘅私生活嘅！」但係有可靠消息人士爆料話，當年葉太同甜湯做保安局正、副局長期間，每逢假期，甜湯經常話要返大陸打高爾夫球，上得咁頻密，據講係為咗約會佳人。
葉太算係半個媒人
話時話，葉太都算係甜湯同Helen嘅半個媒人，當年甜湯跟隨保安局局長葉劉淑儀，擔任副局長（後改稱保安局副秘書長），專責入境事務，因此同入境處關係特別密切。