政情：陳仲尼鋤強扶弱捧荷蘭
前晚世界盃巴西對荷蘭八強戰嘅戰情峰迴路轉，最終巴西輸二比一，搞到好多球迷跌晒眼鏡。香港青年聯會主席陳仲尼（Rock）都係標準球迷，前晚佢拉埋青聯一大班兄弟姐妹浩浩蕩蕩去銅鑼灣CEO Neway睇巴荷大戰，唔通係為咗賀佢成功冧莊再做主席？
阿Rock笑笑口話唔關事，純粹因為巴荷大戰精彩，先搵埋青聯新舊會董一齊玩一晚。兩強相遇，唔知佢自己捧邊隊？阿Rock話本來係捧巴西嘅，但因為身邊朋友大部分都支持巴西，為咗「鋤強扶弱」，所以會支持荷蘭。荷蘭落後一球後連入兩球反勝巴西，現場傳出好多歡呼聲，阿Rock都好高興。
除咗阿Rock之外，同場仲有香港青聯前主席許華傑、副主席朱鼎健同鄭重科，仲有常務會董彭芷君兩公婆。許華傑話，兩隊都踢得精彩，所有人都睇得高興，今次聚埋都係想開開心心，算係達標喇。鄭重科就慘啲，因為佢牙骹戰輸咗要送出半支威士忌，不過佢強調唔使佢一個飲晒。
薛嘉麟唔見影
成班青聯成員去Neway玩，反而身為常務會董嘅Neway集團太子爺薛嘉麟就唔見影，唔通係因為早排畀人影到佢喺遊艇攬o靚模，所以要低調啲避席？