政情：范太發功啄實CY

范太早幾日同傳媒茶敍時，暗寸CY身為行會召集人，經常同政府唱反調好唔應該。講到當年佢以CY民望低為由，話CY唔適合做特首，范太更暗示自己立場不變，句句衝着CY而來。點知翌日CY隨即喺自己網誌度高調反駁范太，話自己至今都無違反行會規定，就房屋問題發表意見，亦不止佢一個行會成員。CY仲話，身為行會非官守成員，說話一定要對社會有「言責」，講到明唔會因此收口，同樣句句頂住范太。

范太尋日出席一個公開活動，大家問佢點睇CY嘅反駁，本來佢都唔想評論，但一聽到有人話佢想藉着打擊CY，為自己選特首鋪路，佢終於忍無可忍話：「佢（CY）都話自己無違反規矩；如果佢有違規，呢個係政府嘅事！」

喺港英年代做過行政局議員嘅范太仲憶述話，當年佢身為行政局議員，只要行會討論過嘅議題，無論自己本身意見係乜都好，都唔會輕易同傳媒披露：「我哋當年嘅行政局首席議員，從來未試過同政府有任何唔同嘅地方，可能佢私底下都未必會贊成晒，但佢唔會講！不過可能當年嘅行政局同今日嘅行政會議完全係兩回事。」

講到當年嘅行政局首席議員，范太呢番話擺明喺度寸緊再三同政府唱反調嘅CY不顧制度，不按本子辦事。不過，范太最後都加番句：「佢（CY）鍾意講乜都得，同樣我鍾意講乜都得！」咁又係，大家都有言論自由，誰是誰非，最好等市民去評理。

對囝囝百分百信任

范太對住CY頂到行，但對住囝囝范駿華（Andrew）就好寬容同信任。早幾日Andrew畀雜誌影到攬o靚模開Ｐ，范太話已經聽咗佢嘅解釋，當日上船嘅都係熟朋友，佢相信個仔講嘅嘢，加上個仔已經三十幾歲，作為老人家，都無謂囉囉嗦嗦，費事影響大家嘅關係。不過問到Andrew被影到攬實o靚模唔放，范太都係話無睇到雜誌報道，總之對囝囝投以百分百信任。