政情：詹培忠囝囝識諗 唔入賭場

係人都知金勞詹賭得兩手，自誇「賭仙」嘅佢，喺拉斯維加斯閒閒地贏過千萬，不過，有佢ＤＮＡ嘅Ricky就話自己無父親咁高賭術，依家幫屋企打理金融投資公司嘅佢，直言不賭也罷，否則變爛賭。佢大讚爸爸係一個特別嘅人，賭術高之餘亦相當有膽識，佢做仔嘅都自愧不如。Ricky第一次入賭場係讀大學嘅時候，當時入去拉老虎機，一開始就好好彩中咗五十倍，點知最後輸番落去，自此佢唔再愛賭，咁多年嚟，即使同爸爸一齊去旅行，佢都唔會跟爸爸入賭場。

賭場唔入，但係以名人第二代為骨幹嘅青年團體，Ricky就有興趣加入，好似好多老友都係成員嘅菁英會同青聯佢都會考慮。睇真啲，Ricky同爸爸好似樣，但佢fit好多，原來鍾意做運動，亦食得清淡，日本菜佢首選。