中環出更（一）：Christofle銀器梁愛詩愛不釋手

縱橫政界嘅詩姐，都有小女人一面。唔使返工嘅周末，佢同唔少女士一樣，愛獨自行逛名店。月初一個周末，卓妮就喺中環太子大廈撞正詩姐出動購物，嗰日係周六傍晚六點幾，詩姐一身輕鬆打扮行商場，起初佢只係齋睇各大名店嘅櫥窗，冇乜心水。

當行到去Christofle專門店前，即時畀新貨吸引，飛快走入舖頭睇真啲。店員見名人光臨，熟落地上前招呼。卓妮所見，詩姐對閃閃發亮嘅銀器首飾分外感興趣，喺舖頭兜咗三、四個圈後，突然停喺其中一個飾櫃前唔捨得走。

買到心頭好，詩姐笑住離開。 （曹家誠攝）

等我兜多幾個圈，睇真啲！（設計對白）

睇中銀吊墜即扑錘

睇中乜呢？原來係一個銀吊墜。店員醒目地攞咗件貨出嚟，等詩姐睇真啲。見到心頭好，詩姐既欣賞又興奮，卓妮仲留意到，詩姐右手無名指同尾指都分別戴上銀戒指，潮爆程度，不遜於後生女！

靚嘢就梗係搶手喇，店員細心地為詩姐查閱存貨紀錄，咁貼心服務，真係唔買唔得囉。揀咗廿分鐘，詩姐決定扑錘，然後挽住袋戰利品笑住離開。卓妮追上前問詩姐點解鍾情Christofle，佢禮貌地報以一笑，然後快步走，真係怕醜！

其實詩姐對銀首飾非常着迷，去年十一月中，卓妮就撞過詩姐幫襯太子大廈丹麥百年名牌首飾Georg Jensen買銀耳環。

Christofle深得名人歡心有原因，佢嘅銀器以奢華、卓越品質見稱，無論餐具、器皿、瓷器及水晶製品都十分精緻，被收藏家視為珍品。