政情：岸西現身低調撐周澄
五區補選曲終人散，雖然早就預咗五位辭職嘅議員會無驚無險重返議會，但一心諗住狙擊毓民嘅白韻琹同有新一代「民主女神」之稱嘅周澄，亦各得萬幾票，成為可以攞番選舉按金嘅少數。縱使成績唔錯，但佢哋異口同聲咁話玩埋今次收爐，下屆無意再參選喎。
前晚大家齊集灣仔會展嘅新聞中心睇點票結果，公社兩黨嘅支持者各自着住黃色同紅色上衫到場聲援，周澄媽媽兼著名編劇岸西亦以一身casual打扮到場撐愛女。雖然岸西都係知名人士，但佢唔想搶囡囡風頭，不但拒絕應記者要求同周澄一齊合照，當周澄接受傳媒訪問時，佢亦只係坐埋一邊睇書等囡囡。雖然低調，但旁人亦不難感受到佢愛女心切。
周澄今次嘅成績，喺「大專2012」呢個團體當中都算係一枝獨秀，但佢話未來想進修同參與多啲地區工作，暫時無意入黨或從政喎，下屆選舉咪預佢嘞。
同樣成功取得萬幾票嘅白姐姐，就話有萬幾人投票畀佢，證明好多人都想對毓民嘅暴戾政治say no喎。但問佢點解讀毓民攞到嗰六萬幾票時，白姐姐就貫徹佢「語不驚人死不休」嘅作風，爆咗句：「呢個世界上有好多無知嘅人嘅！」果然係白姐姐！