政情：許曉暉掏腰包撐自己
民政事務局副局長許曉暉（Florence）上任以來，致力推動文化藝術發展，早前仲特登走去學粵曲添。前晚Florence喺一個籌款晚宴上，就孖住醫院管理局主席胡定旭合唱一曲《帝女花》。唱歌之餘，佢仲自掏腰包捐咗一萬蚊贊助自己唱歌，出錢又出力，認真有心！
同肥胡合唱籌款
Florence前晚再踏台板，同肥胡拍檔唱出另一經典《帝女花之香夭》，一樣精彩絕倫；至於肥胡亦保持一貫水準，令人聽出耳油。前經濟發展及勞工局局長葉澍堃仲做埋客席司儀，呼籲一眾在場嘅副局同政助隨緣樂助，可惜佢哋好似冇乜反應。最後喺冇人反對下，終於拍板決定副局一律捐一萬，政助五千，Florence仲話唔單止要同事支持自己，自己都要撐自己，所以自掏腰包捐咗一萬。
肥胡表演完後同我哋講，雖然佢同Florence之前一次都冇夾過，但合作絕對冇問題，理由好簡單：「《香夭》係我飲歌嚟㗎，差唔多每次上台表演都係唱呢首，對我嚟講完全冇難度！」最後佢同Florence嘅深情演出總共籌得十七萬五千元，皆大歡喜。