每逢政壇有事發生，「搞事四人幫」都會出嚟攪局，今日立法會補選投票日都唔例外。「民主阿婆」陳方安生尋日就蒲頭阿吱阿咗，幫手拉票之餘仲狠批哎吔細佬煲呔曾，話從來無聽過有問責官員杯葛合法選舉，簡直係國際大笑話，「民主阿婆」講得興起，更直斥煲呔曾做法左閃右避，質問佢點解唔一早講明唔投票。「民主阿婆」又鬧煲呔曾帶頭唔投票，會令公務員擔心投票會被標籤！
「民主阿婆」鬧得咁落力，莫非佢想借哎吔細佬煲呔曾過橋谷補選投票率？不過佢即使真係咁諗一啲都唔出奇嘅，事關「民主阿婆」頭上嘅政治光環早已褪色，影響力微乎其微；如果唔係靠鬧人谷投票，唔通靠佢自己咩！「民主阿婆」又自爆老公近日去完倫敦返嚟患上大感冒，未知今日會唔會去投票，如果身體許可都會去投票喎。
唉！「民主阿婆」睇得啲選票咁重要，又會唔會夾硬拖埋唔舒服嘅老公去投票呢？