政情：議員湊夠腳足戰高官
立法會足球隊五月底重出江湖！自年初有五個議員辭職後，變相斬斷立法會足球隊兩條「固地樁腳」，之後對大律師公會同駐港總領事嘅兩場友誼賽，都因為無辦法湊夠六個或以上議員嘅「法定人數」代表而難產。班議員「餓波」一餓就五個月，但今個月底終於可以一過波癮，事關本月廿九日對高官嘅友誼賽已經有七個議員報名，比起之前次次掹掹緊得六個議員落場嚟得踴躍，唔通班議員對高官好唔妥，打算喺足球場上報番一箭之仇？
今次報名落場嘅除咗立法會足球隊領隊、IT界代表譚偉豪（Samson）外，民主黨都有三個人嚟捧場，包括足球隊中堅分子李永達，仲有平時唔多落場嘅甘乃威同黃成智。上次首次報名就觸礁踢唔成嘅民建聯陳克勤再接再厲，醫學界代表「怪醫」梁家騮同最近好出位嘅旅遊界謝偉俊都不甘後人，應承落場打埋一份。
怕甩轆搞地獄特訓
Samson話好意外今次場波吸引到咁多人參加，之前仲試過四圍搵人報名，最壞打算係等立法會補番五個議員，再去睇吓有冇人肯「臨時入局」。不過Samson見出咗通告無耐就有七個人報名，當堂安樂晒，反而開始擔心大家差唔多半年無落過場，可能對腳會生銹唔聽使，依家度緊喺邊度班啲夠分量嘅外援幫手，或者可能會約埋班議員搞「地獄式」訓練，希望班隊友到時唔好甩轆。
記得舊年立法會隊勇挫高官隊，今年唔知可唔可以再下一城呢？Samson話今次場波好難打，因為上次佢哋突襲成功，今次班高官肯定有晒心理準備。為咗保住立法會面子，Samson打算搵高手守實龍門，務求唔贏都唔可以輸。最後結果如何，月底就會喺小西灣運動場揭盅嘞！