中環出更：張學明陳灶良搜羅大埔美食
立法會議員「搵食」各適其適，各有自己開飯窿路，好似家住大埔林村嘅鄉議局副主席張學明，經常拍住大埔區議員兼林村旅遊發展召集人陳灶良，周圍去搜羅大埔地道美食，兩人日前就帶卓妮玩轉大埔區，由朝玩到晚，非常精彩。
晨早七點半，學明同良哥已經坐咗喺大埔鄉委會鄰近間華輝餐廳歎香滑奶茶，仲邊飲奶茶邊向街坊收料，以掌握最新地區資訊。「華輝」最出名係新鮮出爐嘅香噴噴雞批及大大個嘅沙糖蛋球，深受街坊支持。
人面廣怕行街市
兩人歎完茶就帶卓妮行過斜對面嘅大埔墟街市，搜羅漁民自家捕獲嘅鮮魚，學明分別買咗幾百元黃
䱽、油及鱔魚，諗住炮製黃䱽炆苦瓜、香煎鹹油及清蒸鱔魚。
唔講唔知，其實學明好驚入街市買餸，事關佢係名副其實嘅地膽，檔檔都係友好，無可能全部都幫襯，所以惟有經常勞煩良哥代勞。
大埔墟街市食材種類多唔在講，樓上嘅熟食中心街坊小菜及美食亦聞名全港，好似「東記」嘅炸豬扒麵咁，厚切豬扒鬆化肉嫩，粉漿外皮厚薄啱啱好，加上竹筍更好味。不過，學明最讚賞就係「有記茶果」嘅紅豆缽仔糕，紅豆大大粒，超好食，但好快賣晒，最好下午一時前去買。
與大埔墟街市一街之隔嘅大明里廣場一帶亦遍布美食，好似茶餐廳經營嘅蒸盅頭飯及點心、燒味餐廳，仲有專賣香滑豆腐花嘅舖頭仔，部分食肆仲營業到凌晨，肯定唔會餓親。不過，學明對晚餐比較重視，佢嘅「飯堂」除咗屋企及大埔墟大日子酒家外，仲有坐落林村許願樹嘅荷曄庭園景餐廳。
晚餐「西式中食」
荷曄庭園景布置優雅，小橋流水充分配合林村大自然環境，有姿勢中有實際，食物水準甚高，好多食客慕名幫襯。學明當晚就柯打咗兩隻三斤幾重嘅原隻澳洲龍蝦做沙律及龍蝦粘米多，仲叫咗呢度嘅招牌菜美國西冷牛扒及新西蘭一級香草羊扒各一份，當然唔少得甜品香橙梳乎厘喇。
餐廳仲有個特點，就係「西式中食」，餸菜大大碟放喺圓桌大轉盤上，輪流轉到客人面前，食幾多夾幾多，好似一份美國西冷牛扒就有成一公斤分量，可以切開七件，足以畀一家人分享。
學明、良哥與餐廳邱老闆相當熟落，大家不時相約談食經，有時學明中午趕時間無飯食，邱老闆親自為學明炮製鹹魚（馬鮪）雞粒炒飯，呢款「學明炒飯」獨一無二，難怪呢度成為學明嘅飯堂。
卓妮