政情：英政壇新貴CY叼吓光
英國保守黨黨魁卡梅倫喺大選中擊敗白高敦，取而代之成為英國首相，隨即着手組織新政府。盛傳保守黨影子財政大臣奧斯本會出任財政大臣，而呢位疑似英國新財政大臣同行政會議召集人梁振英（CY）原來有過一面之緣。
CY尋日喺網誌提到，兩年前佢喺英國曼徹斯特出席保守黨一個新春酒會，就係由奧斯本代表保守黨參加華人嘅新春團拜，兩人因而見過面。
講到英國大選，CY刻意提及卡梅倫同奧斯本都十分年輕，卡梅倫只得四十三歲，而現年三十八歲嘅奧斯本如果真係做得成財政大臣，將會係英國百幾年來最年輕嘅財政大臣。
CY今年已經年過半百都仲係疑似特首候選人，唔知佢對上述兩位仁兄年輕執政有何感想呢？