政情：張文光貪靚做激光去斑
立法會議員張文光尋日現身立法會開會時，右邊面上貼咗一塊藥水膠布，唔講仲以為佢朝早剃鬚剃損塊面，實情係佢走咗去做激光去斑，傷口未好番所以要貼膠布。估唔到，原來張文都係貪靚之人！
張文話佢右邊面中間位置有一撻黑斑，前排一位醫生朋友同佢講，呢啲黑斑會愈嚟愈大，所以建議張文用激光去斑。於是十分尊重老婆嘅張文就徵詢太座嘅意見，張太話如果張文整完之後會英俊啲就整啦！
就係咁，張文就滿心歡喜去做激光去斑嘞，至於價錢，張文點都唔肯講，只係話操刀者係朋友嚟嘅。
張文黨友李華明，前排受一種叫做「疣」嘅過濾性病毒困擾，最後求助於皮膚科醫生史泰祖，史泰祖仲順手用激光幫肥仔明去除色斑，呢次張文去斑又會唔會係史醫生傑作呢？