政情：辭職五子「重返」勢被玩殘

公社兩黨五名議員辭職，建制派由頭到尾條氣都唔順，罕有對預算案提修訂，都係為阻批補選撥款，雖然修訂案否決收場，但等佢哋補選後重返議會，一樣有大把「迎新」活動招呼佢哋，其中一個做法，就係唔畀佢哋再坐影響力較大嘅重要委員會，而政府帳目委員會同立法會研究雷曼事宜小組委員會就係首選目標。

跟唔上進度　無理由回歸

五人裏面，有兩人係帳委會委員，空缺現由兩名泛民議員頂上，本來講明補選過後就由原本兩人坐番，但帳委會主席黃宜弘尋日話，咁做有問題喎，帳委會已就第五十四號審計報告展開聆訊，預計七月休會前交報告書，兩名泛民「臨時工」無理由依家拍拍籮柚行咗去，換番唔知頭唔知路嘅兩名「重返人士」入嚟寫報告㗎？據了解，兩名泛民「臨時工」亦打算有始有終，完成埋手頭呢份報告書先至功成身退。

五人中有一人係雷曼小組委員會委員，前日小組亦喺閉門會議商討五人重返議會後，若有人想入小組會嘅問題，最後決定屆時由內會決定，不過，其實結局已定，有建制派議員私下指出，雷曼小組會涉及特權法，不可兒戲，原小組委員缺席幾個月，閉門會議又無詳細會議紀錄畀佢「咪書」，點跟進度呀？所以，大家都唔贊成佢回歸咁話。

公社兩黨上演辭職騷前，五人中有一人係民政事務委員會同海濱規劃事宜小組會嘅副主席，另一人係工務小組副主席，建制派同意，呢啲副主席位置由泛民保留，不過，唔代表原本兩人重返議會後，呢啲位可交番佢哋手上，建制派消息表明，唔會畀兩人坐番副主席個位。建制派咁做，道理好簡單，無非想畀啲顏色泛民睇，亦講個訊息畀社會聽，咪當立法會係無掩雞籠，話出就出，話入就入！