中環耳目：Sup 1生蠔鵝肝俘虜陳家強
法國生蠔新鮮味美，唔少香港人都畀佢嗰啖海水味勾魂攝魄，迷惑法國人嘅鵝肝，其豐腴甘香嘅質感，亦一樣係港人至愛，加埋香味令人暈得一陣陣嘅黑松露，搞到財經事務及庫務局局長陳家強一個月都要去嘗鮮一次。
中環歌賦街只係短短嘅一條街，食店同精品店林立，嚟搵食有尋幽探秘嘅趣味，各式各樣嘅菜式都有得揀，不過水準就良莠不齊，並唔係間間都靠得住。街上嘅小店Sup 1，以法國菜嚟講都算經濟實惠，陳家強大讚佢哋嘅蠔夠新鮮，鵝肝又夠靚，加埋招呼又好，所以即使捐窿捐罅，一樣吸引到老饕蹓躂。
開業四年嘅Sup 1，提供十種生蠔，不過有部分係季節性提供，只有Ecaille Dargent、La Perle同Gillardeau呢三種法國蠔係長期供應。至於由法國入口嘅新鮮鵝肝，先用黑松露汁醃一醃，然後再煎香，香味與油分配合得恰到好處，難怪大受歡迎。
