中環出更（一）：鄧達智壽宴鄉紳食神撐場
新界原居民向來夠團結，每逢喜慶事總會大事慶祝，好似屏山鄧氏後人兼著名時裝設計師鄧達智（William）早前舉行盛大盆菜宴慶祝母親生日後，前日輪到佢自己生日，其好友元朗鄉紳文富穩就喺元朗大榮華酒家筵開五席請客，華懋集團掌舵人龔仁心一家、鄉議局主席劉皇發嘅設計師女兒劉玉蓮及女婿余漢坤都有捧場，相當熱鬧。
文富穩委託大榮華老闆「食神」梁文韜為William炮製生日宴，菜式有炒玉如意（牛吊鐘）、瑤柱浸大
雞、清蒸三斤重烏頭魚、沙參玉竹燉蝴蝶腩等。文富穩為一併推廣元朗地道美食，晚宴食材均取自元朗區，仲邀得漁農界各行業代表出席簡介食材特色，包括勝利牛丸老闆胡順清夫婦、「鵝鴨大王」郭誌有、「雞王」黃元弟、「豬王」陳建業及音樂農場創辦人方志雄等。
細個鍾意睇師傅閹雞
壽星仔William一講起飲食就龍精虎猛，佢推介元朗嘅游水海鮮、新鮮蔬菜及傳統盆菜，又介紹元朗勝利牛丸，佢話好多去外國讀書原居民子弟回港後都會第一時間去幫襯。食到瑤柱浸大雞時，William就想起年幼時喺圍村好鍾意睇師傅閹雞，佢話師傅刀、線並用，話咁快就閹完，佢仲記得當年好百厭玩師傅把刀，結果被師傅喝罵：「再搞把刀就閹埋你！」語畢令眾人捧腹大笑。
晚宴臨近尾聲，William趁侍應推出壽包及糕點時，就主動到席間祝酒答謝大家到臨，有人講笑祝賀佢六十大壽，佢即時碌大雙眼話：「我十六大壽咋！」卓妮見龔仁心都玩得好興奮，原來佢同文富穩只相識兩年多，但相當老友，經常周圍去搵好嘢食，嚟緊六月將會到元朗品嘗正宗嘅基圍蝦，屆時卓妮再為大家直擊報道。
卓妮